TOPAL Stepan

 Stepan Mihayloviç Topal (1938-2018) – Gagauziya (Gagauz Eri) kurulmanın aktiv katılanı.

 Erleşmä: Komrat kasabası.

  Stepan Mihayloviç Topal duudu yanvarın 8-indä 1938 yılda Komratta çiftçi aylesindä, o en küçüktü, edinci, uşaktı. Onun bobası Mihail Födoroviç – Tuna aşırısından göçmennerin ardıçı.

  1946 yılda, bakmayarak zorluklara, 8 yaşında Stepan Topal gitti birinci klasa. Dördüncü klasta onu kablettilär pioner, edinci klasta sa o girdi TLKGB-nä (ВЛКСМ).

  1956 yılda Stepan Topal başardı 10 yıllık şkolayı. Ancak üüsek şkolada ileri dooru üürenmää deyni o “Комсомольская путёвка” görä girdi bir yıllık kurslara Kişinöv alış-veriş tehnikumuna. Nedän sora döndü Komrada, neredä zanaatına görä girdi işä.

  1963 yılda Stepan Topal çaarılȇr askerlää Sovet Birlii Silählı kuvetlerinä, neredä askercilik etti üç yıl Kamışın kasabasında Volga kenarında. Askerciliktän sora barabar karısınnan hem küçük oolunnan döner Vatanına – Komrada. Bu andan prezidentin eceli sıkı baalanȇr gagauz halkının hem ana kasabanın ecelinnän.

  Komrada döndüktän sora Stepan Mihayloviç oldu Ţivil korunması dolay bakannıı başı. Sora o olȇr Komrat dolay bakannık komitetindä dolay yol bölümün başı, taa sora YSB, sora da YSB-11 başı. Bu andan onun politika zaameti, Gagauziya kurulmanın aktiv katılanı gibi, başlayana kadar Stepan Mihayloviçin may hepsi zaameti baalıydı yol işinnän, maşinalarlan, tehnikalaylan hem insannarlan işlärdi.

  Avgustun 16-sında 1989 yılda Stepan Topal Erli greva komitetin başı oldu, 13 gündän sora da Respublika greva komitetin azası olȇr. Noyabrinin 12-sindä 1989 yılda geçti Gagauz halkının temsilcilerin özel toplantısı. Bu toplantıda kuruldu Geçici Komitet, angısının başı oldu Stepan Topal.

  Fevralın 25-indä 1990 yılda Moldova Sovet Soţialist Respublikasında geçti seçimnär Moldova Sovet Soţialist Respublikası Üüsek Nasaatına hem erli kuvetlär organnarına. Seçimnerin sonuçlarına görä Stepan Topal seçildi deputat Moldova Sovet Soţialist Respublikası Üüsek Nasaatına hem dä barabar Dolay Nasaatı deputatı, angısının başı hep o oldu.

  Oktäbrinin 24-ndä 1990 yılda Gagauziyada geçti seçimnär Üüsek Nasaata, angısının başı oldu Stepan Topal, dekabrinin 1-indä 1991 yılda da Stepan Mihayloviç Topal seçildi Prezident. Bu görevdä işledi 1995 yılın yazına kadar. Ama 1995 yılından sora da kendi halkının hem Gagauziyanın hayırı için o aktiv pay alardı cümnä işlerindä, son günnerädän kalarak savaşçı hem halkının gerçek oolu.

  Yaşaması onun bitti, ama hatır Stepan Mihayloviç için taa yaşȇȇr. Miras gibi evlat boylara o braktı tiparlı hem eldä yazılı işlerini, angıları büün bülünȇrlar “Stepan Topal adına Muzey-evi” İstoriya-kultura merkezindä. Tiparlı işlerin arasında bulunȇr kiyat “По зову предков”.